WASICHANA 6 WANUSURUKA KUBAKWA

WASICHANA sita wanaosoma

katika Shule ya Sekondari

Mzindakaya katika Kijiji cha

Kaengesa wilayani

Sumbawanga

wamenusurika kubakwa

baada ya mlango wa

nyumba yao kuvunjwa na

watu wasiofahamika na

kutishia kuwaingilia kimwili

kwa nguvu .

Wakisimulia kisa hicho

wasichana hao walimweleza

mwandishi wa habari hizi

aliyefika shuleni hapo juzi

kuwa ni baada ya wiki moja

tangu wenzao wawili

kubakwa kwa zamu na mtu

mmoja asiyefahamika

ambapo mwanafunzi mmoja

aliyekuwa akisoma kidato

cha nne shuleni hapo kati ya

hao waliobakwa alijiua kwa

kunywa sumu ya panya.

Kwa mujibu wa wanafunzi

hao watano kati ya sita

walidai tukio hilo lilitokea

usiku wa manane kuamkia

Alhamisi wiki hii ambapo

wote sita wakiwa wamelala

chumbani mwao

waligutushwa na sauti ya

mlango uliokuwa

umefunguliwa na watu

wawili waliokuwa wamevaa

‘kininja’ kuficha sura zao.

“Tulipogutuka tulianza

kupiga kelele kwa sauti ya

juu ndipo watu hao wawili

waliokuwa na kisu na rungu

walitumulika na kurunzi ya

mwanga mkali usoni. Bila

shaka waliacha kutubaka

walipobaini kuwa tulikuwa

wengi,” alisema mmoja wa

wanafunzi hao na kuongeza:

“Ndipo walipoanza kutupiga

kwa marungu

wakitulazimisha tuwapatie

fedha zote tulizokuwa nazo,

sisi tuliwaambia kuwa

hatuna chochote ndipo

walipozidi kutupiga marugu

mwilini na kutishia

kutuchoma kisu iwapo

tungejaribu tena kupiga

kelele za kuomba msaada”.

Kwa mujibu wa wanafunzi

hao ambao walikuwa

wamerejea kutibiwa katika

zahanati kijijini humo

walidai kuwa ndipo wenzao

wawili waliamua kutoa

akiba zao mmoja aliwapatia

Sh 1,300 na mwenzao

mwingine alikuwa na Sh 800

hivyo jumla walijikusanyia Sh

2,100.

“Lakini sisi ambao hatukuwa

na pesa yoyote ya kuwapatia

walizidi kutupiga marungu

bahati mbaya sana

walimpiga mwenzetu mmoja

ambaye alikuwa anaumwa

na kumwongezea maumivu

mwilini kisha wakatokomea

kusikojulikana, “ alisema

mmoja wao.

Wanafunzi hao watano kwa

pamoja walidai kufikia

maamuzi ya kuhama

nyumba hiyo ambapo

walikuwa kwenye mchakato

wa kupanga chumba katika

nyumba nyingine kijijini

humo.

Pia wamewalaumu wazazi

wao kwa kuwa wagumu

kuchangia ili waweze kuishi

katika hosteli za shule kwa

usalama wao. Hata hivyo

walimu na wanafunzi wa

shule hiyo wanawashuku

vijana waliovamia kwa wingi

kijijini hapo maarufu kama

‘wezi wa mafuta’

wanashirikiana na baadhi ya

wakazi wa kijiji hicho

kufanya vitendo vya kihalifu

kijijini hapo ikiwemo visa

vya ubakaji wa wanafunzi

wa shule hiyo waliopanga

vyumba kijijini humo.

Wakati mwandishi wa

habari hizi alipofika shuleni

hapo Mkuu wa Shule hiyo ,

Nicholas Thomas na walimu

wengine walikuwa

wanakutana na Ofisa Kata

wa Kaengesa kwa

mashauriano ya kuimarisha

usalama na ulinzi kijijini

humo.

Mkuu huyo wa Shule

alilieleza gazeti hili kuwa

mwanafunzi aliyekuwa

ameumizwa ametibiwa na

kuruhusiwa. Pia wazazi

wake wameridhia kuwa

kuanzia siku hiyo aanze

kuishi katika hosteli za shule

hiyo kwa usalama wake.